LUFUNO
Tshivenda poem by: Thabelo TshavhuyoTheme: Love
Lufunofuno lu mbiluni inwi vhafunani,
Lwone a si lwa u lila maṱo a vhathu,
Lu nauwa mbiluni dza vha funani,
Lwa vha kulumedza u funana zwo lungwa.
Lufuno ndi mpho ine ya bva kha Mudzimu,
A si matambavhana ane ra a vhona maguḓani,
Ni tshi galelana sa mbudzi i tshi khou vhevhetela,
Mafhungo a tshi ganzhila na endela u sola lufuno.
Lufuno vhukuma a lu funi musuku na lunako,
Lu funa vhuthu ha muthu na mbilu thethe,
Ngauri ḓuvha ḽine musuku wa noka nga ḓuvha,
Mbilu dzi mbo ḓi thoma u ḓalelwa dza pfudelwa
Nge vhushai na ndala zwa vha zwo no nondela,
Ha namba ho pfumba ṱhalano vhukati ha vhafunani.
Wa thoma u funa muthu wau fune zwi ngohoni,
Ḓuvha le wa mu funa wo tou mu khetha zwi mbiluni,
Wa fhedzisela wo ita tshilingano na Musikavhathu,
Na ri u bva ṋamusi ni khou ṱoḓou funana.
Lufunoni sa lwendoni hu na migodi na dzithavha,
Izwo ndi dzinginya tshileme tsha lufuno lwaṋu,
Vhoinwi litshani u sumbana nga muṅwe,
Ni khwaṱhise lufuno lwaṋu nga vhuronwane,
U swikela ni tshi khaukanywa nga lufu.