Isihlahla sempilo

isiZulu poem by: Sinenhlanhla Manzi
Theme: Death


Nom' ilanga lishisa bhe,
Kuthul' umoya du,
Kim' uyisihlahla sempilo,
Ezimpandeni zakho kujul' ubunzulu,
Kulapho ngincel' izindlela zokuphila,
Ekujuleni kwezimpande zakho,
Emagatsheni ngithol' umthunz' oqabula kamtoti,
Ngihlale phansi kwakho kuthule cwaka,
Uphephezel' umoya licwathe nasebukhweni bezinja.

Zifik' iziwishiwishi zonya lwabanomhawu,
Zihhahhame ziwishiza ziphephula kwasan' olwakho,
Bekugenc' oSigencabagence bekuncish' ikusasa,
Lufik' usuk' olumnyama lokugencwa kwakho,
Kushabalale konk' okuxhumene nawe,
Yek' uqhakaz' ubusika nehlob' uhloba,
Kimin' ubungumthunz' oqhilik' ukunotha,
Kimin' ubuyingceb' ejulil' ekhiqiz' impilo,
Yek' unya lokuf' olusobozel' abamnene!

Mhlab' ungumamboza futh' ungumaqhumisa,
Nami bengiyimbeng' ehlobe ngobuhlalu,
Ngaphansi kwalo muth' omagatshagatsha,
Kwafik' izihong' ezidela ngonyembezi,
Zangiphahlaza ngempiselo ziqhub' elobudlova,
Zangibuth' othulini zibabel' elibeni,
Ngob' umhlab' uyamboza futh' uyakhulisa,
Udoncul' isihlahl' ebengicambalala phansi kwaso!

Mama, kim' ubuyisihlahla sempilo,
Namuhla ngimanxebanxeba,
Noma sekwadlul' iminyaka kodwa,
Ngisamile kuwo lo mhlabathi,
Imihla ngemihla ngibuka lapho waphelela khona,
Sekusel' idundu nesidul' esiphehlwa wumuhlwa,
Maye sengiyinhlwa!

Ukub' ukhona ngabe ngiqine ngokwanele,
Umuzwa wenkumbulo yakho soz' ushabalale,
Kulo mhlab' ogabe ngezivunguvungu,
Kuqinis' ubuhlungu nesizungu,
Sengiyoziduduza ngokukhumbul' imfudumalo yakho,
Ngithath' indlela kudekud' emhlabathin' owawujule kuwo.