Motlholagadi

Setswana poem by: othusitse Moses Lobelo
Theme: Death

Madikeledi go reng o bokolela, a o lelesiwa ke leso la ‘gwe?
O a makatsa, ka o ne o mo kobile lapeng o mmitsa sekopa.
Tlhogo e tsorotla madi, ka tshipi o mo rathile le go mo opa. 
Ledinyana la ‘gwe la bofelo, o le feditse mmogo le ba bogwe.
Hokong ya dikolobe a dula gone, go ijela magogo le dikolobe.
O tlhabile kgobe ka mmutlwa, ene o mo tsholela le dikolobe.
Le ba ‘eno ba mo fetogetse, ba lebala ba kile ba mo ja dithata.
A kgwiwa seka segotlhola, ka madi a fedile a tshela ka bothata.
Gompieno o sule, jaanong o a itidisa ka o ipatlela madi a dikatso.
A ga o tlhabiwe ke ditlhong go lela sa maitirelo selelo madikeledi?
Dikeledi tseo ga se tsa bohutsana, ke tsa boithamako madikeledi.
Itshwabele o tsoge bolaong joo, madi ao ga a go tshwanela a dikatso.