A yi fi hi rin'we
Xitsonga poem by: Ximbani Eric MabasoTheme: Hope
A yi fi hi rin'we
A wu hamba u tigogela elawini,
U dya buku vusiku na nhlikani,
Xichuvambara ketiketi!
U huma ntsena hi ku angula
ku tswiyotiwa hi ntumbuluko.
Vhiki khe, n'hweti khe, u ri marhumbyini,
emakorhweni ya khwiri ra layiburari,
U tswonga vutivi bya tinhlanga
ta Valungu hi nkhinkhi.
Ndleve u ndzi lumile, u ku u lava
ku tlhomiwa ra ndzhangelo risiva.
Kunene swa tshova moya ku feyila,
Kambe hambiswiritano,
vutivi lebyi mileke na timitsu,
a byi tsuvuki hi ku tsandzeka ka wena;
I ndzhaka yaku kuyakuyile;
Hi byona vutlharixidzi byebyo.
Ve ndlopfu a yi fi hi rivambu rin'we.
Na wena u nga wi mapa hi rin'we!
La tsandzekeke hi la weke a ku gagaga!
ku nga ri wena la weke hi khwiri.
Kasa kunene u ta ya fika.
Ku tincikinyisa a hi ndlela yinene,
Ku kukutlela mhondzo a hi xitshunxo.
U ta fika u ku yini eka N'wini wa vutomi?
