O BE A LE MO!
Sepedi poem by: Matebane Oscar NkogatsiTheme: Love
O be a le mo, e le moledi
E le mohlaletši wa pelo-nanana ya mokaka nna,
A nnametša setimela malaiša
Kgothakgothe ya maikutlo,
Khutlong tša lethabo ke khutile le yena.
O be a le mo, mathata a le mola
Diba sa pelo se phsele,
Dinaledi di dikadikile kgoro ya phelo bja ka,
Mahlo a apere wa lethabo monola.
Mothepana wa go swanela lebole,
Wa go swanelwa ke ntepana,
Ka tsebjana tša maphekwana,
A nthaletše mollwane wa boduto,
Mmoto a nkagetše wa go ntekana
Go tshelela ka go yena ke sepela.
A re, ke go ratile, ke go ratile,
A nkopelela sefela, a etla gonna a ithoma
A re go šitile pela go laela ke fao e hlokang mosela.
O be a le mo, ke sa mo hloke
Bjale o ile, ke boduthong.
